做咗人媽咪之後, 其實無乜大分別. 只係時間上問題. 有時出街唔想去太奈, 心卦卦bb. 要我排辛苦次序的話, 1) 湊b  2) 生仔  3) 陀仔  我都唔係好記得生仔既恐佈, 有幾痛. 我初初都以為好難忘記生仔. 但當我好忙去湊b既時候. 就自自然然唔記得係醫院個31個鐘係點樣過. 

其實生bb真係好開心, 身邊既人都好開心, 包括我爸, 媽, 姐, 哥. 朋友, 親戚. 見到佢個心都甜哂.

因為失血過多, 我要輸三包血, 每一包四粒鐘. 好攰隻手又痛. 因為穿水超過24小時, BB要睇定D驚受感染. 兩母女住到12月9號先出得院.

去到醫院產檢就知, 一個個水桶坐係度. 每次見醫生唔超過3分鐘, 但係排隊就起碼個半鐘以上. 每次入到去醫生就會問 : BB有無郁, 上床CHECK CHECK. 跟住有個胎心機聽肚, "拿呢個就係BB心跳" 跟住落床. "枼酸, 釫片食哂味?開番D比妳" 一個星期後再番黎, 走得啦. 好簡單既對話. 不過求過心安理得, 就算3分鐘既對話, 都會照去. 個個都坐到呆哂. 一張張紙版咁木口木面係度等.

好佩服有D大肚婆戒口好清. 我就受家人影响乜都照食. 因為父母話乜都可以食. 佢地會買榴槤比我. 又會叫我食大閘蟹(不過我唔肯食, 佢地重話我做乜唔食), 我會食雪糕飲汽水, 麥當勞, 海鮮...... 我D朋友一聽到就會鬧, 知唔知對BB唔好架.  但係妳又知唔知大肚婆都要令自已開心D. 苛爾蒙影响下, 我試過無端端喊, 老公都R哂頭. 我搬走粉嶺個日喊得最厲害, 因為一來唔捨得, 粉嶺個段日子我雖然住咗年半, 但係二人世界好開心. 坐係床邊不斷流眼淚, 我又唔會呱呱聲. 搬走咗之後又無乜野喎. 有時會好開心. 無端端心情好好. 妳話啦. 大肚婆最好就係令自已常處於開心狀態, 所以我唔會壓抑自已唔可以食呢樣食個樣, 食得開心就食啦.

有時望住個肚見佢係咁郁黎有郁去, 真係好得意. 有個BB係我肚入面, 唔知佢玩緊乜. 轉身定食手指, 係度估佢做緊乜. 又係度諗, 點解BB要出到黎先會喊, 如果係肚入面都會喊咪好得意囉.  BB有時好大力, 佢可以郁到我痛, 仲會卡住我D骨, "啪"一聲. 妳話佢玩得幾開心.

佢未出世, 我已經跟佢改口叫我老公做爸爸, 仲有公公, 婆婆, 姨姨. 我發現婆婆買親衫都較男仔. 已經買咗件白色冷外套比佢3個月後去我亞哥結婚用. 4D都照過幾次, 但係老人家仍然會痴心妄想生果日係仔. 我好肯定我奶奶會再催我生仔. 因為我幾個月前已經聽佢講過, 唔好隔咁奈都要生番個仔. 仔? 乜真係咁重要咩, 老一輩思想真係好重男.  玩人地個B同自已湊真係兩回事. 輕輕鬆鬆叫人生, 咁邊個養, 邊個湊?

我又搬屋又有新成員, 真係要駛好多好多錢. 為咗新成員又要請個姐姐番黎看B. 亞姐姐又要申請, 又要食,又要住. 再加上我公司生意越黎越差, 我上個月都出唔到一半糧, 公司拖數. 我估產假既糧都凍過水, 唔知幾時先可以有. 我最需要用錢既時候反而比公司拖糧. 自我安慰下, 聖誕節我要坐月無得出街, 所以唔駛旨意SHOPPING.  等生B期間, 屋企人會照顧我三餐. 除左打的出街之外, 基本上都唔需要用錢.

我每一日都會計BB滿月係幾時, 今日係27號. 如果今日生我就趕得切坐月完出街食聖誕大餐, 因為我鍾意X'MAS 個氣氛. 我已經計劃同老公, BB去邊度慶祝, 但如果係12月1號打後生. 過咗X'MAS 就無得食LU. 不過我又好期待新年, 個氣氛又係好好, 除咗要派利事之外. 坦白講, 妳話我孤寒又好乜都好, 我會覺得大家差唔多年紀其實唔需要派利是比未結婚既朋友, 可能係我20幾歲開始已經唔會收同輩既利是, 就算收我都會買番糖或者餅比派利是比我個人,  因為係我角度利是係比小朋友買糖食. 人大咗出黎搵錢就唔需要收啦. 派比老人家我都會. 比管理員, 清潔亞姐都會, 因為係答謝佢每一年既幫忙.

不過純粹係我個人意見, 當然見到朋友我都會照派. 又試過朋友話如果佢收到我派$20/封佢會唔開心, 我問點解, 佢話覺得大家咁熟, 我起碼要比佢$50/封. 我真係R哂頭+ 無奈. 可能係朋友仲未諗到一頭家開支有幾大. 我相信當朋友置一頭家, 每年新年起碼要派3千蚊利是佢就唔會咁諗. 利是係一個意頭, 並唔係著重幾錢諗錯咗啦. 

重有D怪行為, 我亞媽要我, 睇個個長輩封幾多比我. 例如佢封$50/封. 我唔可以封$20比佢個仔. 我亞媽話無理由人地要蝕. 重有時我無出現佢幫我派住先, 番黎問我攞番,  真係.... 無奈. 唔係見到面先派, 尤得幫我派架咩? 變左利是唔係隨心, 係交換性質, 仲要唔可以拖欠. 派幾錢又表示個人好唔好環境, 或者咁啦今年我封封都係$100. 跟住全年札緊褲頭咬庶啦. 

陀B既最尾一個月, 我只係重咗0.3kg. 個肚比起其實大肚婆係好細, 媽咪話我好似得7-8個月咁. 我諗係胎水少. 依家日日係屋企休息, 訓下教. 因為恥骨痛既關係, 所以每一晚起身都好痛, 痛痛下個人就醒. 一般都會係零晨, 1點半, 3點, 5點起身去廁所, 跟住7點就起身食野, 11點再訓過.

媽咪叫我好好享受呢段陀B日子, 因為生完有排忙. 仲會想塞番佢落肚. 哈. 好有趣.

我個樣變咗好多, 一來係肥啦, 二來無做 FACIAL 黑咗. 又水腫. 個NOSE 又紅又腫. 個樣好似好攰. 尋日的起心肝去剪頭髮再短D. 生完唔駛咁煩麻.

依家隨時生, 所以都幾刺激架.

講住咁多先. 88

我係媽咪呀. 妳係我個肚肚入面己經有266日. 住得舒唔舒服? 媽咪知道陽水唔係咁多, 可能迫咗少少, 妳張就下啦.

好快媽咪嗲d就會見到妳, 究竟妳係父系強d定母系強d呢 ? 妳兩個唐家姐都係似清順. 唔知妳會唔會似我呢(嘻, 媽咪靚d, 妳自已決定啦, 不過嗲d高喎!!!)

幫媽咪一個大忙. 出世個陣快d開夠度數, 因為媽咪怕痛. 妳知我一向都係緊張大師. 我都驚我嚇到震哂. 我要見到一個肥肥白白, 好可愛既bb. 我知妳一定做得到亦都會幫我. 幫我唔好咁驚, 幫我鎮定d. 

有時夜晚, 夜深人靜訓唔著, 會諗起陣痛. 穿水入院過程, 真係嚇到標冷汗. 所以訓得唔好囉. 再加上左邊恥骨痛, 妳知媽咪一晚要去n咁多個wewe, 轉身落床都要用好多力同慢慢落. 所以個人都醒哂.

媽咪咁多日都落唔到街, 除咗打的去醫院.好彩公公同婆婆買野比我食, 今朝公公仲等delifrance 開門買媽咪最鍾意既5號餐添呀. 婆婆就幫我去下銀行入數, 煮下飯.買報紙.好似多咗好多個工人.

今日嗲d搵咗好多同事幫手搬屋, 真係好感謝咁多個叔叔, 因為媽咪又唔可以幫手. 真係辛苦哂嗲d咁多日. 又油油, 裝假天花, 裝抽油煙機. 打地腊, 抺屋, 買家品. 不過我知嗲d都係想安頓哂所有野, 等妳出世有個好舒服既環境住. 真係好啦嗲d攪掂哂, 媽咪無擔心過. 安心養胎. bb妳要吸收多d營養喎.

妳肥姨, beryl & natalie 姨姨都好好, 話要黎探媽咪, 不過我想生完先同佢地玩過痛快, 可以打牌, 開大食會, 都好期待x'mas 一齊慶祝. 

bb妳要乖乖地, 聽嗲d媽咪話, 做一個健健康康既可愛bb. 食媽咪牌奶奶好唔好?

love u

媽咪

我口中既衰老公, 係好可愛, 好抵得諗, 基本上佢會照顧哂我日常需要, 唔駛我擔心. 話佢衰其實係耍花搶. 有時當佢做家務時, 我因為懶唔願郁, 訓係床望住佢做野, 我就會話: 老公, 我嫁比你好唔好. 佢會答我. 好, 幾時呀?  我問呢個問題已經問咗3年, 大大話話有百幾二百次. 佢又唔會覺得我煩個下好野, 或者佢明白我只係唔想郁, 但係又唔好意思咁懶, 講黎等自已個心好過 d.

我知我有時好衰, 會激嬲佢, 不過都係因為佢成日掛住打機, 我好悶所以想整下佢或者收埋佢d野等佢搵下. 我好似小朋友咁想引佢注意我囉. 我都知食完飯係無野做, 就算你唔打機都係坐下度陪我睇電視, 不過睇電視又真係唔駛人陪既. 我又係矛盾咗d.  

黎緊老公會越黎越忙, 因為要搬屋, 我又大住肚唔可以幫手. 諗起都知佢會好辛苦, 又要執屋, 又要新屋油油, 又要訂床. 到時又要執屋. 又要整定bb野. 一定會好攰. 老公, 慢慢黎啦. 搬新屋係開心既事, 有新成員又係開心事. 當然, 一下子既變化可能要時間去適應. 我地都慢慢去處理啦. 我相信夫妻一條心, 無話唔得既. 乾巴嗲.

就好似我出親街, d9唔搭8既人會問我幾時生, 我其實好唔想答. 跟住佢地就會問點解我個肚咁細, 又會搵身邊d大肚婆黎同我比較 "下, 人地出年2月先生, 個肚同你下個月生一樣大喎" 我想問: 咁點呀? 你想我點答? 個個人都唔同架啦. 可憐既我重要笑笑口答 "下. 係咩?"

身型, 樣, 比人批評已經見慣不怪, 唔好講我個b, 唔該, 唔需要特登讚, 亦請唔好搵野彈.

點解醜樣咗咁多? 妳對腳點解咁粗既? 0華, 你驚唔驚瘦唔番? 妳唔好再食啦 ! 0華, 16比9呀 ! 個鼻點會咁大架, 又紅喎好肉酸呀. 次次見就次次問, 唔悶架咩?  無答案架, 我點知點解啫. 大肚婆實肥架啦, 個個都係水筒架啦. 最緊要係我個BB住得舒服.

臭口棗, 臭口棗, 可唔可以唔好講廢話呀? 你知唔知我好想嘲笑你地  標.  

眼見自已身型越黎越大咪, 都有D驚架, 連屋企人都話我越黎越醜樣, 聽咗梗係唔開心, 不過去咗一D講座之後,就無所謂啦, 因為個個大肚婆都係水筒咁既身型, 咁即係話正常啦. 無理由攞我廿幾歲青春無敵個陣去比較. 

記得上年擺酒前一個星期先決定租屋. 就係個7日內完成簽約, 買傢俬,搬屋. 好趕架.

依家距離生B仲有一個月到, 我地又將會搬屋, 真係...... 趕到呢. 不過因為仲未攞到鎖匙, 所以時間同籌備方面一定要做得好好, 若果唔係會亂上加亂. 

我同老公既愛情結晶品就快出世, 真係好緊張. 唔知似我定似佢呢, 係我懷孕5個月既時候醫生話係仔, 奶奶同我媽咪開心到呢, 因為係第一個男孫麻差唔多要開香檳. 過左一個月, 個醫生改話係女. 哈, 到我同老公超開心. 因為鐘意女嗲d, 又可以著靚衫. 奶奶同我媽咪反而唔多願意接受, 強調係醫生睇錯. 我8個月個陣去照4d, 我亞媽問我" 點呀, 照到JJ 味?" 哈. 真好笑.

我計劃攞前2後8產假, 因為係屋企無所事事其實係幾悶架, 係度等. 等... 等.... 究竟等咩.  等搬屋定等入院生仔? 我都唔清楚.

起初係諗住開刀架, 妳問十個女人十個都會答, 生仔十級痛. 梗係開刀啦. 我之前booked 浸會. 由細到大都有個願望係浸會生bb, 因為我都係浸會出世架麻. 到陀咗3個月之後, 由於上網不斷睇過來人分享. 有情況係就算妳預咗6萬找數, 點知大量出血私家最後收十幾萬. 再加上開刀之後個傷口會痛好奈, 係肚度開7層喎,個人會好傷架. 其實我係02年因為有朱古力瘤, 做過腹腔鏡, 係肚開3個洞. 肚池放 camera, 另外2個放鉗. 雖然手術成功但係我身子弱, 差唔多都要半個月先可以落街. 每一日都訓係床到休息. 個人好攰好無力. 我就諗, 如果肚開7層, 我都唔知我要幾奈先康復到. 最重要係依家生bb, 我之後要照顧佢架, 無咁多時間比我訓床休息. 所以最後決定順產囉. 

bb 係我肚入面踢我, 個種感覺真係好特別. 有個小生命由米咁大粒會變咗一個bb真係好神奇. 唔敢相信自已會有一個bb 係肚入面走出黎. 我估係我呢30年最重大既大事件. 我要變媽媽啦. 會唔會係一個勁煩, 勁長氣既肥師奶? 我都估計唔到, 希望唔會啦.  

除咗"我好懶" 解釋到之外, 重有 " 我扮忙" 可以作為補充.

我陀住 Penley 妹妹已經7個幾月啦. 倒數重有70日Penley 就會出黎過x'mas , 我同老公, 屋企人當然好期待呢一日啦. 話哂係外父外母第一個孫麻.

係陀b呢段日子, DINA媽媽要做一連串 n 咁多個驗身. 我9月16日係私家用$260做咗個血糖測試. 朝早空肚抽血. 跟住飲一杯75克既葡萄糖水, 等2粒鐘空肚再抽血.

我就係衰咗血糖超標. 所以私家陳醫生幫我出信去 QE要求跟進. (我要讚一讚尖沙咀陳柳娟醫生. 細心. 好傾. 盡責)

我9月22見QE醫生, 跟住就安排我盡快入院做一個全日血糖測試. 9月24我晨咁早5:30就起身睇新聞, 知道7點前會改掛3號風球我就拿拿聲入院. 7:45 我去到QE辦理手續. 

到8:45 我抽第一次血. 抽完就比半碗肉碎粥我食(糖尿餐) 唉... 邊夠我飽. 

12:00 抽第二次血 (篤手指頭)

12:45開飯啦. 飯 200克, 時瓜, 香芧汁焗無骨豬扒, 清補涼豬肉湯, 橙一個 都唔夠我食..

3:00 抽第三次血(篤手指) 今次超標, 唔合格

5:00 抽第四次血(篤手指)

6:00 開飯啦. 飯200克, 時菜, 白汁焗魚柳

人肚餓乜都覺得好好味

8:15 抽最後一次血 (篤手指) 

大家睇睇我既時間表, 就知道我係醫院悶棍咗一日. 咪以為有張床我訓下. 其實係要坐櫈,睇電視, 睇報紙. 睇雜誌. 係醫院範圍自遊行一日.  我都以為入院既意思係要換埋病人衫. 等我重帶埋拖鞋, 櫃鎖 , 個袋好鬼重.

我今朝又收到電話, 因為唔合格, 醫院又要我3點番去抽血. 我唔介意抽血走黎走去. 只希望 Penley 妹妹健健康康, 肥肥白白. 好多親朋戚友都話我好肥, 變哂樣. 但如果可以令 penley 健康有營養既話, 作為一個準媽媽其實係唔會在乎. 至於血糖方面, 好多孕婦都有呢一個問題. 係關乎一個人既飲食習慣. 我本身都食好多野有 115磅, 依家一下子要我食少一半, 其實我好肚餓架個肚成日咕...咕聲. .  到現時為止我已經重咗25磅. 我諗到生得起碼都有148. 朋友恐嚇我瘦唔番. 其實我都估到8成係瘦唔到. 只希望  penley 出世起碼有7-8磅 好湊d. 我依家乜都係放penley 第一位. 因為佢係我肚入面只有我可以去保護佢, 照護佢. 出世之後呢個重任就會轉交比我老公. 我要佢快快樂樂健健康康成長.

愁也一天 喜也一天

遇事不鑽牛角尖

人也舒坦 心也舒坦

每月領取養老錢

多也喜歡 少也喜歡

少葷多素日三餐

粗也香甜 細也香甜

新舊衣服不挑選

好也御寒 賴也御寒

常與知己聊聊天

古也談談 今也談談

內孫外孫同樣看

兒也心歡  女也心歡

全家老少互慰勉

貧也相安 富也相安

早晚操勞勤鍛鍊

忙也樂觀 閑也樂觀

心寬體健養天年

不是神仙 勝似神仙

謝: 趙朴初先生92歲時作品

話說我老公同事想向拍拖多年既女友求婚, 精心策劃係AVIS 尖東遠東租車公司租架 MINI COOPER 開篷, 由我老公幫忙1:30前去攞車, 再落旺角攞99枝玫瑰, 5:00前去到海洋公園交低架車比同事, 目的係要比女友一個 SUPRISE  (驚喜)!!

殊不知, 係我倆公婆好有SUPRISE. 1:15到達AVIS, 簽文件準備取車, 要CREDIT CARD 簽定1萬5千押金 + $2000 2天租車費用.  由SALES係７樓停車場楂落地下比我地驗車，　點知黎咗架好肉酸既橙色車MINI. 殘殘舊舊, 個篷同後座又有燒煙印, 車全身都有花痕, 軚令都有.已經問個SALES 有無第二架, 好殘喎. SALES話無，公司租得出去都預咗有花痕. 咁唔緊要因為有張租車紙可以劃圖, 圈哂所有有問題既部位, 免得還車有爭執, 我同老公兩對眼都睇得好仔細. 

OK 攪掂完, 就開咗個篷由迴旋處出發向海皮方向, 開車一轉左過咗燈位, 我坐前面就聽到細細聲, 同老公講有BOB BOB BOB BOB......聲, 老公要搵地方停車望望, U咗入去大富豪夜總會門口. 發現前左轆漏氣. 我地即刻打番比 AVIS. 個SALES一聽就同我老公講，你接咗架車就係你負責. 0華. 好不負責任既服務態度，去死啦, 我地開左１分鐘唔夠已經發現有問題同佢講就咁答我. 我地要求AVIS派員工出黎, 因為我地都唔敢再楂架漏氣車. 佢同事出黎望咗一陣, 老公問有無士啤軚換, 個同事答無, 我地話唔敢楂佢叫楂番去, 個同事叫我地行路番AVIS 由佢楂番去.

我地一坐低, 頭先聽電話個SALES就話 "梗係踩釘爆軚啦, 唔出奇呀" 我同佢講D釘你放架,咁肯定踩釘. 同一時間佢地另一個SALES 入黎話有另一架MINI 又係爆軚叫其它同事上去7樓, 我地嘈咗一陣佢話要搵經理(亞叔)處理, 個亞叔黎到就話轉架 CIVIL 比我地用, 大佬我兩千蚊你比架CIVIL 我. 又嘈完之後佢地終於肯搵同事係7樓楂架同色既開篷MINI落黎叫我地出去驗車, 呢架係好好多, 好少花痕無咁殘舊, 應該一早比呢架客人用. 入戲肉啦, 突然有另外一個SALES 出黎話, 頭先架車有新花痕唔租得另一架, 你地要入番去寫字樓傾賠償.

佢一咁講, 我同老公FEEL 到呢間野想屈水, 我地要報警. 老公話入去睇咩事先.  個經理(亞叔)入房同另一個高級D既亞姑匯報, "呢兩個客租車一出去就整爆左條軚". 我即刻喝住個亞叔, "小心用字眼, 我地無整爆, 係你地比架爆呔車我用, 我都未話你咁危險" 亞叔繼續講, 留上同事發現有新刮花車痕. 應該係頭先剷左上"駁"造成. 嘩! 出招啦, 老屈完踩釘再加剷上駁, 真係大導演, 六月飛霜. 個一分鐘路程, 你出去搵條駁比我, 亞姑要求我地上去7樓停車場睇新刮花車痕. 我同佢講, 上去跟本無意思, 你同事已經講話新刮花, 跟本想入我地數, 上到去你地都係想屈到我地認啫, 我地要報警. 亞姑話因為交車同事唔係大富豪接車個同事係有兩位, 大家要一齊睇下個痕係咪之前已經有. 我又再講, 咪駛旨意屈我. 刮花亦係有可能你同事係大富豪接番架漏氣時, 刮花咗依家屈落我地度.

亞姑極力要求上7樓, 又話未必係我地刮花. 咁味上去睇下佢吹乜. 哈. 上到去. 前左軚條link 刮花哂, 我地收車前未有, 去到大富豪落車望都未有, 仲要有生锈油漬. 佢地5條友你一言我一語, 編埋個故事比我同老公, "一出車剷咗上駁所以穿咗條軚" 又以專家角度用刑事偵緝同法証先峰口吻, 話係新刮花既. 又高度讚掦mini cooper 車採用防爆軚, 按漏氣既速度, 係我地造成, 唔係交車時已經有.  佢地個個同事楂咗都好有經驗, 唔會發生刮花車呢D事.

好呀, 好呀, 入哂我地數, 真係以顧客(賠償)為先  句句都係保障自已公司, 佢地話要拆咗條軚比公司customer service (類似呢個部門) 去處理索償, 睇下係因為踩釘引致刮花, 定一話刮花引致爆軚. 白痴仔佢無發現跟本係同一樣野, 都係屈緊我地用咩方法整爛個軚. 我問點解唔係一間第三者公司去檢驗, 係由佢地自已公司驗番呢? 佢先話, 我地會攞去驗車公司.

我同老公認為唔識處理, 亦無謂再嘈, 我地報警求助. , 亞姑話兩個同事都好多野做要番落去寫字樓. 我話我報咗警, 呢兩位係負責發車同收車都要落口供. 咁個亞姑同亞叔就即刻話有野做要走先(幾精)

亞 SIR 黎到, 我地一五一十講哂成件事出黎, 個大富豪收車同事突然打溫情牌話 "我見佢係大肚婆, 所以做好心免得佢曬, 先叫佢番寫字樓, 依家佢話我楂番黎個車刮花部車, 我都唔知發生咩事." 0華 ! AVIS 真係受過專業培訓, 員工落口供技巧確係有一手. 第一, 我完全唔覺得佢地有體諒我係大肚婆, 無謂推落大肚關係呀,  第二反咬我地屈佢個員工刮花車, 明明係佢地公司屈緊我地.

亞SIR 講都好中肯, 員工梗係幫番公司, 客人應該收車時小心D. 如果 AVIS 要我地賠償, 我同可以攞番住將收車紙,(因為前軚都一早圈哂係有花痕) 點解AVIS 可以咁肯定新舊花痕之分? 可以入小額錢債告番佢.

跟住我地落番去OFFICE, 因為老公同事堅持繼續租用另一架MINI COOPER, 其實我已經極力反對, 我同AVIS 嘈到火紅火綠仲叫我落去講" 唔該, 我想租另一架MINI" 大佬, 佢地已經老屈咁有一手. 又租第二架 ???? 亞SIR 都問我, 妳地仲租佢地D車即係都認為呢間公司唔係呃人啦. 我真係十萬個不願意, 係我老公先咁好人仲幫個同事求婚用. 

落到寫字樓要攞番D証明文件, 亞姑出黎"橋"埋雙手問我, "依家點呀" 大佬妳short 架, 我又唔係妳下屬, 我要向妳回報亞sir 講乜. 妳問番妳d同事好過啦. 我話"咩點呀" 佢跟住講, 依家我地會攞個軚去驗,睇下係咪踩釘整穿. 我問"咁, 刮花呢, 妳口口聲聲話可以check 到新舊花痕" 亞姑轉軚, 其實我地問過換條軚軨都係3千蚊到, 不過呢d刮痕可以磨番, 應該幾百蚊攪掂.

去死啦, 之前要我地賠成條軚, 依家見我地報警, 聽到我地又話去銷毀會投訴要check下佢地過往有無比人投訴過. 即刻轉為淨係check 條軚有無踩釘. 手段悲卑, 咁大間國際公司做埋d野咁下賤. 生意手法好有問題.  佢要我地賠, 我一定同佢玩到底. 就算幾百蚊我捐去慈善, 都無可能益AVIS呢D咁拉圾公司, 要客人幫手出錢比佢翻新D車, 食屎啦!

大家咪以為我同老公好嬲, 其實事後我地係咁笑, 因為諗係咪因為我地個樣"霖" 所以老屈我地, 一話我地個額頭有寫住"蠢"同"笨"呢兩個字. 我地都未試過比人屈, 真係好難忘.

9月份我先知道, 個朋友比AVIS 罰咗幾百蚊爆呔費. 我當然明白個朋友係唔想我為呢一件事再勞氣, 費神. 但我相信如果當日朋友在場的話, 亦都會感到呢一個係騙局. 呼籲要租車既朋友三思..小心.

我認為幾好呀. 因為有好多歌唔一定係網上搵到. 但始終係 HMV 既新嘗試, 歌曲有限. 有待進步.   

運氣並唔係好命人獨享, 記得人頭馬嗲利廣告" 好運自然來" 咁點樣可以吸引好運埋身? 不如一齊搵搵你衰邊犯啦 ! 

吸金12法 Rule No. 1 : 永遠掛上親切的笑容

滿懷心事, 愁眉不展的人, 通常難得喜神眷顧, 如果皺眉之餘, 還加上長旴短嘆, 這個人恐怕一生得與不幸結為兄弟. 無論如何, 表情不外乎習慣, 由今天起, 經常對鏡子裏的自已微笑, 還有, 隨身攜帶一本笑話, 有空時翻閱, 遠離文藝性悲劇. 包括小說及電影. 緊記: 錢 + 微笑息息相關, 是孖生兄弟.

Rule No. 2 :  每天閱讀1則發遠故事

每個人都經歷到勵志的階段, 也是說, 每個人都看過億萬富豪列傳, 但有些人養成經常的習慣, 有些人三分鐘熱度, 後者只不過曇花一現的激情, 難以產生聚焦作用. 每天撥出固定時間, 閱讀勵志的書藉, 堅持地相信, 它和吃飯一樣重要.

Rule No. 3 切勿將獎品隨手丟掉

好運如滾雪球, 愈滾愈大, 第1個好運出現,可能是無關痛癢的獎品, 但你不可掉以輕心, 我常看到有些朋友, 在宴會中得獎, 一看是三流獎品, 嗤之以鼻, 轉手送與他人, 他不是送出獎品, 是送出好運.

就算沒有用的獎品, 也要心存感激, 珍惜收下, 過一段時間, 才可送與他人, 珍惜每一個上天賜給你的好運.

Rule No.4 : 不可養成賭博的習慣

橫財亦是偏財, 偏財相等大眾之財, 註定財來財去, 難以久享, 這是命運, 也是宇宙法則. 當一個從不賭博的人沾上賭博的習慣, 已代表他與惡運連繫, 是壞的開始. 大多數人由贏錢而墮入輸錢的深淵, 固然是運氣, 更大原因與自律有關. 懂得自律, 你起碼賺了"不輸"這桶金, 站在社會大多數人之上.

Rule No. 5 切勿憎人富貴

既然你喜歡錢, 自當喜歡有錢的人, 正如你喜歡吃東西, 自然喜歡美酒佳餚, 但普偏人由自卑, 嫉妬等心理, 發展出對有錢人愛恨交集的心態. 提起來, 咬牙切齒極度怨憤. 這些失常的心態遠離客觀標準, 自絶於好運, 戒之為妙. 當你懷抱有錢人都不是好東西的心態時, 你已選擇另一個人生方向. 永遠不做有錢人.

Rule No. 6 戒悲劇的口味

大多數人不自覺有悲劇口味, 例如: 嫁不去的看獨身女人手記, 窮極無聊, 看餓快活的雜文, 不快樂時, 看末日浩劫 等災難性電影, 又或傾向於與潦倒同志呻氣, 醉卧街頭. 當悲劇口味成為嗜好, 生活主流, 你真真正正成為悲劇之一.

Rule No. 7 和有錢人交朋友.

你始終要交朋友, 為什麼不和有錢人交朋友? 基於物以類聚的法則, 和有錢人交朋友是改財運的捷徑. 你要學習以下幾交友要訣.

1) 不提金錢, 有錢人通常對錢異常敏感, 一定不可觸及禁忌.

2) 不等相交, 因為無求, 你遂可平等地交往, 建立長久的關係.

3) 慎言慎行, 不可賣弄關係, 四下炫耀, 有錢人最痛恨是非流.

簡單點, 和有錢人交朋友, 代表你克服矛盾的心理, 不再壓抑對財富的喜好, 喜歡錢, 當然喜歡有錢的人.

Rule No. 8 養成佈施的習慣

每一個月, 抽出部份收入, 回饋社會, 數量多少不重要, 重要的是心意, 只要真心真意, 小小的數目已可產生巨大的回報善果.

佈施是生活一部份, 終身的目標, 切勿視為許願的臨時交易. 善待同類相等善待自己, 以佈施催財, 並不罪過.

rule no. 9 付錢時應付微笑

我見過不少人付帳時 , 出現心如刀割的表情, 不用說, 他們容或小富人儉, 財運一定不會好, 原因是他們竹旳財富能量有入無出, 是一潭死水, 付帳時, 應面帶微笑, 如果克服不了心痛, 馬上在心中誦諗以下的确定語, "它(指付出的錢)將會千百偣回來, it will come back in a hundred golds !!!! 想到這裏, 你當如釋重負, 欣慰莫名.

rule no. 10 積極參與喜宴場合

喜宴場合, 可以解釋為幸運能量的結晶, 獲得邀請, 應該抱分享的精神, 踴躍參加. 只要你投入, 湧現與當事人一樣的喜悅, 你便可溝通channel對方的氣場, 換言之, 同樣擁有對方的好運.

大多數人參加喜宴, 抱 "貼錢買難受" 的心理, 這是非常不應該的態度.

RULE NO. 11 修茸祖先的墳墓

家運往往和陰宅風水息息相關, 財運也一樣. 如果你一直倒霉, 破財不已. 不妨慎重考慮, 整理祖先出墳.

整理山墳在雙重意義, 1) 將連繫自己的負性能量減少. 2) 表示一點感恩之情, 重新建立與宇宙本源(生命力) 的密切關係.

RULE NO. 最後一點 12  適當的吝嗇是致富良方

蓋茨身為世界首富, 坐飛機只挑經濟位, 李嘉誠身為香港首富, 手上一隻精工錶戴了超過二十年, 日本的超級巨富松下幸之助, 一直省下董事長專用的辦公室. 有錢人通常有一套花錢的標準, 普通人頗難理解. 但懂得吝嗇, 明顯是重視金錢的表現. 只有重視金錢, 金錢才會被吸引到你的身上.

適當的吝嗇相等花錢的原則, 你一定要學, 而且堅持.

睇完12秘訣, 希望各位可以早日上岸, 搵到人生既第一桶金, 再發掦光大.

happy easter.

一年一度既復活節又黎啦, 我今日突然想起細路仔時代養既2隻白兔 bebe & gigi. 佢地有一個另我一生難忘既故事.......記得係家姐亞哥買佢地番黎, 細個養乜都玩得一大餐. 有時同佢地沖涼, 有時執屎, 得閒抱下又餵佢地食野, 養到佢地肥肥白白.

殊不知, 一個月黑風高既深夜, 我聽到老豆大鬧, 跟住有淒厲既喊聲, 我見到家姐喊緊, 原來兔仔磨抓嘈到老豆訓覺, 老豆下令要即刻掉咗佢地. oh, no... 無拉拉要掉咗佢? 係極度唔願意既情形以下,  家姐阿哥一人抱住一隻白兔出咗門口. 我當時好驚, 因為老豆好惡, 我唔敢出聲,番左入房.

過咗無幾奈, 家姐阿哥終於可以返入屋, 但仍然不停咁喊, 佢地話將bebe & gigi 放落後樓梯個紙箱入面, 因為老豆唔比帶番入屋. 唔知點算好, 就係咁, 我地三個成晚都無乜點訓, 因為驚比垃圾婆掉咗, 又或者白兔自已跳走咗.

到到第二朝, 一朝早家姐倒屎咁早就出咗門口, 原來佢成晚就係諗點樣安置佢地, 佢飛的去咗阿爺屋企, 求收留. 眼見孫女從未試過咁早探佢, 又眼濕濕咁可憐, 老人家又點會 say no.

自始, bebe & gigi就過住快樂既生活, 阿爺買咗一個大鐵籠, 將佢地放係"大騎樓",  空氣好, 食好, 住好. 我地三個重經常去探白兔, 亦多咗好多同阿爺相處既快樂時光.

又過咗一排, 可能由於"騎樓"風水好既關係, 有一日阿爺打黎,  "喂, 隻兔生咗仔"  吓... 無拉拉生咗?? 又唔見大肚, 你話我知生咗咁奇?  趕到去, 見gigi 訓係個櫃入面, 隔離好多白色毛毛, 原來前一晚阿爺聽到gigi 叫, 嘩, 佢要so 啦. 阿爺幫佢接生,生咗5隻, gigi 生完之後會咬自已少少毛包住bb, 好有母愛, 但gigi 無餵奶, 過咗2日, bb 死哂啦, 又係阿爺埋尾, 今次做執屍.  

又過咗一排, gigi 又大肚啦, 我地好驚歷史重現,  今次我地已經諗定幫佢餵奶, 餵係細路都鍾意既維他奶, gigi順產, 又生5隻. 我地好小心咁一隻隻餵佢地飲維他奶, 隔日就去睇bb, 有一日去到阿爺又話 "死哂囉" 唉.... 我地都估到.

又過咗無幾奈, 有一日去探白兔, 點解gigi見到我地無乜反應? 真係好奇怪, 同平時好唔同. 係我地懷疑緊既時候, 亞爺話" 換咗囉, 補咗50蚊"  吓... 講乜呀.?? 阿爺再講 "呢隻係日本品種, 公黎架."       吓吓?? 原來阿爺怕佢再生,繼續落去唔係辦法,  倒不如, 換過一隻公番黎.

其實, 我地都無辦法知道究竟係gigi 死咗, 阿爺買一隻新番黎? 定一話真係換一隻補50蚊?  咁gigi去咗邊? 邊個買咗佢, 買佢重乜?煲黎食定養?  後來 bebe 成日同gigi 2號 happy together, 搞基阿陰公 !

過咗一段好長既時闁, bebe死咗啦, 得番gigi 2號一個, 可能真係日本種既關係, 佢變到猫咁大隻. 養咗幾年死埋. 我地就再無養啦.

講到呢度, 我都有d眼濕濕, 唔係因為兔仔既悲慘故事, 而係感謝阿爺對三個孫既個種保護同細心. 我諗, 其實係gigi 死咗. 因為個個年代一隻白兔, 點會咁貴要用一隻交換再補$50蚊呢. 亞爺避免我地傷心先講呢個 trade-in 方法.

講番老豆, 咪以為佢依家仲係咁惡喎. 因為人係會變架, 十幾年前佢已經收哂火, 變得好"霖" 重成日比我地蝦. 始終人老乜得睇化啦. 我地依家好好架, 有時會陪佢唱下k. 我發誓,第時佢變陌爺公我唔會夜麻麻趕佢出街, 不過, 家姐阿哥會唔會我唔敢保證.  哈哈. 

我充完電啦.

興幸同老公2月21-26日參加六天團郵輪假期, 兩個人加埋團費一萬六. 廿四小時任食, 任玩, 都可以算係抵玩.

呢隻超大郵輪有十一層咁多, 六天總算每一層角落都行過. 不過摩打聲同搖搖下令我暈船浪, 呆咗幾日. 雖然任飲任食但我無乜胃口, 但我老公就超開心, 佢已經步入亞伯年紀, 好嚮受呢種閒情日子, 佢話可以玩多四個月係郵輪就好啦.

簡單講下呢幾日做過乜比大家知.

第一日, 係海港船12點集口, 由領導指示排隊check-in做pass 程序, 已經發現好多外國人, 咩國藉都有. 到到2點可以登船. 上到船又要排隊過出境關, 再預早過台灣境. 3點鐘終於可以入房. 4點15分全船人救生演習, 番自已房著好救生衣再去5樓甲板列隊. 5點開船啦. 6點去4樓食正統西餐(ok啦). 夜晚周圍行下, 隻船開得唔係好快. 好穏定. 夜晚我重訓得幾好添.

第二日, 全日都要係船上渡過. 因為要航行去日本漫長的一天. 10點訓醒去咗9樓食自助餐.         飽飽之後周圍行囉. 船有圖書館, 露天泳池, 室內暖水池, 健身室, 百老匯表演聽, 購物商店, 攀岩牆, 主題酒吧, spa區, 賭場.行完都腳遠啦. 下午去咗玩 bingo, usd28/4x games, 鬼佬讀number, 圈得中第一舖有 usd50, 第二舖有usd60, 第三舖usd80, 第四舖usd160. 我地無中, 不過都消磨咗一段時間, 雖然有好多客人都話隻船唔靚. 但我已經好滿足. 第二晚訓唔到, 因為船開得好快. 訓係軟床但係成身摩打嘈, 震, 好難訓得好.

第三日, 12點到咗日本沖繩, 有得落船梗係開心啦. 我同老公即係跑去打的, 落outlet mall, 心目中有好多野想買. 但失望無我鐘意既burberry, 波鞋款又唔靚, 為咗爭取時間, 又即係打的落三越百貨. oh... 仲衰過永安. 不過沖繩始終係一個舊城市, 相比東京既繁榮梗係差天共地. 好多小商店賣沖繩特產, 日本野包裝真係好靚, 但價錢就一d都唔靚, 我好老套地買咗幾個香港有得賣既公仔鎖匙扣, 老公就買咗t-shirt. 行咗一陣又再搭的士去 Duty free. oh... 同香港個間一模一樣貴. 好彩老公好醒咁指咗我去一間商場. 買咗小小野咁囉. 6點趕番上船, 7點又開船去下一個站 - 基隆.

第4 day, 唉. 前一晚隻船拋到有離心力, 我好唔舒服,零晨5點先訓到, 魂不附體既我跟住老公12點落咗船, 上旅遊車去"頂"泰豐食小籠包, 跟住去101購物中心影相, 再轉車去九份買手信, 食我既致愛"酸菜臭豆腐", 記得03年12月同老公黎過九份, 不過當時我重係潘小姐, 今次黎係蔡太太啦. 拖住佢手我覺得好浪漫, 因為重遊舊地好有拍拖feel. 但我發現佢淨係諗緊買乜同食乜好. 望住佢覺得佢好可愛. 因為食得是福.  7點又趕番上船. 今晚去咗睇百老匯跳舞同拉老虎機0.25usd一舖, 竟然比我拉到 usd405. 超開心.

第5 day 一早10點到高雄(星雲大師)佛光山,       午餐去酒店食齋菜, 3點要番上船lu趕番去香港.

第6 day , 老公唔開心扁咀, 因為佢仲想繼續郵輪假期, 但我一早6點已經彈起身準備走佬, 因為訓得唔好, 我好掛住屋企張床, 今日係葵涌碼頭落船, 有旅遊巴去番海港城. 其實我都有少少唔捨得. 又唔知點解永安無影大合照.

細節不能盡錄, 記憶中每一個服務員都好親切帶以微笑. 大家係 lobby 跳舞. 船主晚宴. 老公帶我去全船最唔拋既10樓訓覺. 甲板同其它客人閒談, 係一種好舒服既感覺. 有機會的話, 大家都可以選擇郵輪假期.