今年聖誕完全無氣氛, 因為唔凍囉,距離2007 重有2日, 唔經唔覺又一年, 回顧今年, 我既變化較大, 辭退咗一份做咗5年半既工, 休息咗足足個半月, 再踏入一個新工作環境. 記得無業既日子, 人變得懶洋洋節拍慢九拍, 每日訓到中午, 下午睇卡通片, 深夜睇劇集, 諗起去邊就去邊, 我會為咗食一碗麵, 自已一個人由九龍灣去馬鞍山,我好悶? 唔係, 因為想做就去做.

回顧既同時亦係時候計劃出年目標, 記得4年前舊老閭提醒我, 每一年都要為自己訂下目標, 不論事件輕或重都要言出必行直至達成. 03年初我完成咗考車牌呢個目標, 雖然第一次出街考牌係撞車, 但第二次我終於成功啦. 如果當初我因為失敗易放棄, 相信陰影永遠存在, 我呢一世都唔敢再考牌.

5年半既個份工, 我一直豫疑應唔應該轉工, 轉咗會點, 不斷衡量自已得與失. 係老公既支持下我決定轉工, 凡事有得必有失, 視乎自已接受與否, 敢於嘗試. 我無後悔, 因為知道每一個旅程未去到終點又點可以段定係行錯路, 既然行緊呢個方向咪繼續前進, 如果唔對路未轉吰囉, 一個圈有360度, 總有一個度數適合.

我出年個大計係改變時間分配, 訓少D因為想有多時間做自己想做既野, 打機又好, 煲碟又好, 讀書又好, 去玩又好,  唔想比番工時間支配自己, 日日由早做到晚, 放工後又要休息, 為乜?

人要過得充實, 不枉此生. 到年老時諗番起, 我後生個陣顧住番工, 健康差之餘重要乜都無做過, 你話幾好笑,幾無奈. 瞭解自已想要做既野, 珍惜同家人朋友既相處, 呢個永遠係快樂時光. 番工辛苦要記住份糧分配係咁: 1/8用腦   3/8受氣  1/8 加班  1/8人際, 1/8 生活支出, 1/8 為前途. 將煩憂既時間放係放工去邊,  約邊個出街. 買咩獎勵自己, 打電話同朋友嗲兩句等等...   玩完番工精神奕奕, 能醫百病.

沖深捉角喂, 塊落易凌凌漆, 慢屎升2, 伸睇件腔,

栗頭