今朝係屯門巴士站離遠見到一男一女扭作一團, 兩位人兄都年過40,  女既似追家用唔比男既走, 引來多雙八卦目光.

聽真d, 講咩報警唔好走,唔駛上法例,  我留意咗你好奈, 原來

男人掉垃圾, 個女人卦有証件(可能係食環署卦) 拉住個男人, 再用對講機 call 咗兩名便衣, , 一個似亞叔, 一個就運動型既, 跟住個男人只好攞身份証出黎.  0華, 咁就$1500, 所以奉勸各位通知屋企人千祈唔好亂扔拉圾, 因為路人甲, 乙, 丙, 丁都有可能係便衣或食環署, 掉張紙巾都千5, 好肉痛架. 不過我一向都唔隨地亂扔, 所以無有怕

朋友玩緊一個遊戲, 寫封信比廿年前既自已, 所以我又黎啦

給廿年前的我 - 9歲 (小學三年級)

恩恩,

雖然天機不可外洩漏, 但我想話妳知流血事件將會發生係妳身上, 中文書有一課"猫鈴" 講述老鼠怕家猫, 所以決定搵死使放個鈴係猫頸, 老師搵左幾個同學扮老鼠做話劇, 妳係其中之一隻, 但妳好蠢, 妳比猫追個陣自已撞咗個頭去窗邊條鐵到. 穿咗個頭成身都係血, 入聯合聯咗3針, 唔駛咁驚, 因為入手術室之前妳亞媽會買包M & M 比妳補番數.

到小五小六妳會有一個補習老師, 操到妳好好成績, 到到廿年後佢地屋企出現問題, 妳會倒番轉頭去幫番佢地, 好好感情.  

跟住入左間女校, 派位個陣妳唔鍾意好唔開心, 因為同學仔話女校好變態, 心理唔平衡, 變老姑婆, 但到到妳長大後我比妳選擇一百次, 妳都會選番呢間女校, 因為有好多美好回憶, 依家既摰友全部係妳中學同學. 要努力讀書. 尤其係會計要考LCC, 最好中五收科物理, 有助妳考護士.

不過做唔到護士都唔緊要, 記唔記得妳有3個志願, 1)編輯  2) 老師  3)秘書, 妳會做其中之一樣.

感情方面有喜有悲, 悲既又真係幾慘, 不過係因為妳細個思想太過童畫式, 所以唔知世途險惡, 好彩妳潔身自愛, 淨係輸感情輸金錢. 拍過N次後, 妳變得好精, 朋友介紹下係某年8月認識到丈夫, 妳見佢第一眼覺得好孰口面, 好親切個個就係啦.  亞女, 命中妳有食神跟住, 妳唔駛學煮飯, 因為佢識煮重煮得好好味, 唔駛擔心.

我唔理妳點儲都好, 總之出黎做野每個月一定要儲$500. 唔儲妳會後悔, 唔好聽朋友講轉保險, 要買定一個, 最好買宏利因為有息派. 到香港開始實施MPF, 要玩高風險, 妳亞哥好精買高風險, 依家係妳既幾倍, 叫屋企人買匯豐5號仔. 同妳屋企人講, 小心親戚佢地會當妳屋企係ATM. 唔好太有同情心借錢比人, 要留個錢係身, D人唔還錢, 晚年富貴過妳地

要孝順父母, 對佢地好D, 因為第時佢地好錫妳, 但係我比妳選擇, 越對屋企人好, 屋企人就管朿得嚴, 唔珍惜妳, 相反某人一日到玩自閉, 唔同屋企人講野, 妳父母就買佢怕對佢喧寒問暖. 唉.. 自己諗啦.

差唔多啦, 妳工作好識吞卜, 依家寫呢封信都係番工時間. 小心睇水

p.s. 大個女要做 body-check, 由依家開始唔好比妳亞媽食咁多甜野, 因為佢有糖尿, 高血壓. 要佢跟daddy去打網球, 做多d運動, 妳自已都係, take Care   With love, 長大後的恩恩上

番咗工一個禮拜, 總括黎講都係我心目中理想工作, 我未搵到工之前曾經訂下要求, 呢份工就正正乎合哂

1) 人工(其實計番以前個份bonus 一年黎計, 呢份差唔多, 但可能呢份都有bonus 呢)  2) 近屋企 (番工放工方便, 唔想再搭地鐵, 我依家搭巴士4分鐘落車, 行5分鐘)  3) 離開尖沙咀地帶 (因為我係中環,尖沙咀區已經有十年啦, 好悶) 4) 無OT (咁我以前個份都好準時收工) 5) 男老閭 (男人比女人鬆手D) 6) 唔駛成日番大陸 (係番都係東莞好近, 下星期都去不過即日來回) 6) 開工聽歌 (以前個份都可以) 7) 無其它同事 (自己靜靜做野, 除咗老閭唔駛同人交待) 8) 食完早餐先番 9點半, 無定 LUNCH 時間, 可以肚餓先落街避過繁忙時間)

壞處 : 工業大廈環境不理想.. 星期六要番半日... 待續..

工作同舊個份好近似, 所以TOUCH WOOD 可以應付得到, 無壓力.

我今日第一日番工, 我8:15出門, 點知8:30已經番到公司留下, 惟有食個早餐先, 慢慢爬見到我叔仔攞住公事包番工 (佢住元朗, 係我隔離大廈番工).  

因為上手走咗一個月所以首先要接手佢無做既野, 再硏究公司運作, 老閭無乜架子, 又係1 MAN BAND, 其實公司主要運作已經搬到東莞, 所以我職責係覆email.同安排匯款.  下個星期要抽時間去東莞廠300人, 希望我快d上手啦. 最開心係6點已經收工, 我6:15番到屋企. 好消息係老閭話唔駛9點番, 9點半佢都接受. YEAH!

今日想同大家分享我認為好奇怪既事, 我住係九龍灣xx花園, 一楝大廈有兩邊, 我屋企大廳望正對面樓既大廳, 相距約10米, 幾年前既某日望街, 竟然見到對面樓下一層個女仔(20歲)無著衫週屋走, 我初初懷疑自已眼花, 但因為當時夜晚,對面樓有開燈所以好清楚, 佢重行近WINDOW 可能放咗一塊鏡所以去照一照, 見到呢d咁既野梗係要洗眼+同屋企人講. 我亞媽話佢係特登, 叫我以為咪望. 後來我地經常發現呢家人(媽+女+細仔)經常去廁所唔關門, 連攞廁紙抆都竟然見到. 我尋日唔係特登但又比我見到佢坐係個廁所到, 張開兩腿唔知睇緊乜. 但最恐佈係佢d屋企人都係廳到架. 點解唔用簾重要開哂D window 香港地真係乜人都有.

我由九月一號開始搵工, 大部份求職信都係比獵頭公司, 一個禮拜得一份工有機會見, 係間美國大公司19個國家有辦工室, 我去見採購員, 一去到填個人資料, 跟住就測驗, 做完又要用英文面試. 我無諗過會咁難, 我之前預備既野都無用. 我為咗見工緊張咗2日, 夜晚訓得唔好, 成日溫英文睇資料. 我係緊張大師, 見完我無哂心情, 因為我知道機會不大, 係因為我表現唔好.

我開始懷欵自已應該向邊一條路發展, 因為我以前係一人公司乜都要做, 做既野唔得專一, 乜都係識dd, 其實採購經驗真係唔多, 面試後知道自已識既係好皮毛, 真真正正決定發展要由助理探購員開始. 我會考慮做番老本行秘書囉.

唉...希望下個星期有其它公司既回覆啦.

今日講下潘婉莎, 佢係我個妹, 一個唔識講野既小朋友, 記得係1997年10月某日, 我亞哥攞咗個麥當當最細size既紙袋番黎, 我打開發現有隻狗仔係入面, 我父母一向反對我地養小動物, 話難打理, 又臭, 但係我地三姐弟妹都無理會過係咁勁養野, 寵物如下:- 一對白免 (下場係佢地係咁生仔惟有賣咗一隻, 最後個隻養十年老死, 猫咁大隻) 彩鳳 (下場: 一隻換寵飛走咗, 一隻生仔難產), 一對葵鼠 (係番禺偷運番香港, 屎太臭, 送咗比金魚舖), 龍蝦 (係魚缸生活, 一日都拑d魚), 魚(N咁多款, 以前屋企個魚缸好大2米半X1米), 草龜 (下場係15歲九龍公園放生過團體生活), 蠶虫 (有D變飛蛾, 有D比龜偷食咗) 金毛鼠 (係咁生仔, 自傷殘殺至死, 無咗個頭, 無眼) 金絲猫 (偷走)...... 重有好多, 唔講啦, 講番個妹先

莎莎其實係個護士比我地, 佢兩隻狗生咗六隻, 有幾隻賣咗, 有幾隻送比朋友, 莎莎出世黑咪抆, 無人要係賣淨庶, 但護士話依家佢係最幸福, 因為我地唔捨得打佢, 錫到佢燶, 買蛋糕開生日會架. 佢個名跟我地潘婉X排列, 晶片係寫潘婉莎. 佢細個好百厭, 我地打牌佢發脾氣會係抬底咬爛D報紙, 又或者係厠紙咬條厠紙跑出廳放風箏, 佢習慣係報紙屎屎, 我地唔記得放咗張報紙係床, 佢就疴咗啦. 佢又好有靈性. 每晚我起身去夜尿, 佢都會陪我出廳, 每朝都叫我起身番工, 屋企試過有燒膠味叫係咁叫我走. 不過佢依家老啦, 9歲係老太婆, 成日呢埋, 無咁活潑啦.  我爸媽依家最錫佢, 但我成日都要不斷提佢地, 有一日狗仔係會死, 廢是個日黎得太突然佢地接受唔到. 所以依家锡佢多D, 得閒同佢講野, 摸下佢, 佢就開心架啦. 我陪佢佢亦陪我啫.   

不過我都要奉勸各位, 養乜都好要有責任感, 佢地知道主人錫唔錫佢地架,  如果諗住玩玩下就千祈米養.