香港新浪網MySinaBlog 精選話題工具
新浪網 - MySinaBlog
零時十八分 - 老公話:生日快樂
TAMAMA | 29th Aug 2006 | 一般 | (263 Reads)

記得廿幾歲果陣, 生日都會約一班朋友去唱k, 12點吹蠟燭, 每次都數唔真究竟有幾多人, 因為朋友帶朋友, 有遲到有早走, 玩到零晨又或者通頂, 埋單幾千蚊, 諗起都開心. 我大個啦, 淨係想同屋企人簡單過, 前一晚28號 我煮飯比屋企人食4餸1湯, 我起碼有十年無煮過飯, 我比今晚30分唔合格, 因為燶咗, d味唔好, 煮果樣變咗第二樣, 我見爸媽都好開心, 老公讚我叫我努力 (但我決定金盤洗手)  我哥叫我做 "中女" 即係話人生都行咗一半.  已到中年. 哈. 點解d時間過得咁快?  

我好期待睇住自己老, 睇住另一半變亞伯.  人生係咁架麻, 由童年,少年,青年,成人,中年, 老年, 身邊會有生命加入, 亦會有生命離開. 每個人都不例外, 所以我好珍惜身邊既人尤其係家人, 我相信緣, 有緣先會係家人. 凡事都係相對, 對屋企人好d啦, 唔好比自已後悔. 今晚睇到無線播宣明會, 係樹我想同大家一齊分享, 我正正去年生日助養咗一個印度既小朋友, 個妹妹今年5歲, 每個月$220 就比咗個機會佢讀書, 食有營養既食物, 飲乾淨既食水, 點解我會知. 因為每隔三個月佢就會有一封信比我, 畫滿公仔, 佢剛學寫字, 最鍾意唱歌仔, 同埋小朋友既近照, 當我第一次收到佢張相, 好感動架, 因為我之前唔知佢既國藉, 係男係女, 年紀. 又係一個"緣"字 , 我閒時都會畫番張咭比佢, 寄我既近照同一d卡通貼子, 因為宣明會唔贊成既禮物, 因為驚其它小朋友妒忌, 信入面亦唔好提及宗教, 金錢, 物質. 我有個朋友A小姐公司做文具. 有次我就寄咗過去印度宣明會, 後尾個小朋友既爸爸寫番封信多謝我助養, 收到貼子同文具. 佢話個女太細未識寫信比我, 我當時真係好開心, 因為知道小朋友真係收到, 係到我好希望我身邊既朋友可以的話一齊參與呢個活動, 每個月去少一次餐廳食飯已經可以幫到佢. 我老公就參加另一個機構, 每年$200幫一個國內既小朋友交學費, 我未識佢個陣佢已經供完一個妹妹讀完小六. 真係好有意義架.

留言(6) | 引用(0)

消防員的故事
TAMAMA | 25th Aug 2006 | 一般 | (512 Reads)

我同老公三年前認識, 朋友介紹我識佢細佬先, 跟住知佢有一個大佬, 我就強迫細佬比亞哥張相我睇, 睇落幾有眼緣, 再威脅細佬安排機會, 係月黑風高既晚上03年8月1日係我地初次見面係屯門泳池門口, 佢剛剛游完水, 之後去咗黃金海岸飲野, 再楂車送我番屋企, 同行既仲有細佬同我好友亞婷, 係樹都要多謝呢兩位好友, 因為佢地真係好落力, 真係有做野架. 安排睇戲..演唱會..落bar..唱k..行街..食飯. 其實似我追佢多d. 我知好多女仔好介意邊個做自動, 不過 i don't care 因為幸福係要自已爭取. 唔成功的話nothing to lose.

結咗婚一年啦. 我更加瞭解佢既工作, 佢係一個消防員. 一個快樂既消防員. 好多同事錫佢, 因為佢一日都勁笑, 乜都笑得一餐, 有樂觀既性格. 我兩年前同佢講, 波波你就好啦搵咁多錢, 但係佢答我. , 我辛苦你唔知啫. 其實佢地好大壓力, 但個個同事都唔會番屋企同老婆講因為驚嚇親, 所以會放工後約同事去向茶餐廳吹水. 我有次強迫佢講d case我聽, 佢話羅湖個邊有條河, 好多偷渡客會游水過香港, 點知浸死, 幾日後被發現, 佢地接到order 要去處理, 但唔可以用竹繩撥條屍, 因為驚佢會甩手腳, 惟有跳落河攬佢番黎, 臭到嘔近距離接觸事少, 最慘係要睇醫生, 因為條河係死水就加埋屍水, 好多細菌, 搞到皮膚炎. 呢個只係冰山一角, 仲有單係肥人死後浸出黃色既肥膏......試問有幾多人頂得順.

作為佢背後既支持者, 藉此機會我想係樹 "門小"好多人, 一D好無聊既人, 佢地成日亂報警. case study1)有個男人深夜報案話開唔到屋企到門要消防員幫, 去到係個醉酒佬, 楂住條鎖匙話對極都對唔到個鎖匙位. (emoticon亞叔你係咪玩野先, 酒醉三分醒喎, 想有人送你番屋企出聲囉, 唔駛搵消防員送) 2)亞嬸去電髮, 報警懷欵屋企煲湯未熄火, 消防員去到亞嬸同一時間番到, 間屋無事, 消防員你地可以走啦.(emoticon我懷欵亞嬸想有男人欣賞佢個新髮型)  3) 有人無帶屋企鎖匙報警, 消防員到場話要幫佢爆門, 個人答: 0下, 乜要整爛我個鎖, 唔係你地有匙幫我開咩, 咁唔駛啦, 你地走啦.(emoticon, 如果免費的話就唔會有開鎖舖啦 死蠢) 4) 行山人士報警, 消防員跑到上山係一班小朋友要求搭直昇機.(emoticon小朋友其實碌落山仲好玩, 下次試下啦, 笨!) 咁多單都係流料. 浪費人力物力之餘, 人地消防員好辛苦架番工24個鐘架, 要攞好多野上山架.

我老公係近期既粉嶺三級火警中, 因為燒車軚消防員要噴泡沫, 佢唔小心滑倒, 手腳擦損之餘, 左邊耳珠位插咗落生锈鐵到, 當場爆缸, 個晚幾拾個消防員都要做8粒鐘到深夜2點先收隊, 第二日我老公放工先去補打破傷風針, 護士話個傷口本應要六小時小內聯針, 但太奈啦, 惟有等自已埋口.  一個星期個傷口仲未捨得埋, 到到今日見到, 耳珠位一上一下好核突, 見到都慘. 我知個日唔只我老公一個受傷. 係樹都祝早日康復啦.

食得咸魚抵得喝, 佢地做呢行發生呢D事在所難免, 只奉勸各位消防員記住屋企有人等你番屋企食飯, 要平平安安做一個快樂既消防員呀.   emoticon

 

 

 (閱讀全文)
留言(3) | 引用(0)

人總會終老
TAMAMA | 22nd Aug 2006 | 一般 | (211 Reads)

我最近經常都會去探一對母女, 母大約70, 女就40幾歲. 我係小學五年級就識得佢地(即係我當時10歲, 0華, 都差唔多20年) 因為個陣我成績唔好,亞媽要我補習,朋友介紹呢間住宅型既補習班,每個鐘大約有4-5個小學生. 佢個女就係補習老師啦, 記得當時2房2廳, 所有小朋友就分開2邊枱補習, 主要係對功課, 背默書, 做測驗, 罰抄等等恐怖野, 一個星期都五day, 好痛苦番完上午班, 回家食飯即刻做功課, 因為4點補習要check. 重要買幾本英,數練習, 做完一本又一本, never ending. 老師父母就日日都係屋企, 呢埋係房, 有時就會出去買餸, 我罰留堂就會買野比我食. 係一對恩愛夫妻.

我去到補咗幾個月之後, 成績突飛猛進, 五,六年級都係第一. 當然最開心既係我亞媽同補習老師啦. 到到中一, 無得補習啦, 因為大家住埋同一個屋村都會遇到, 我過年過節都會去探佢地, 好快就過咗6-7年, 老師話佢父母身體開始唔好, 唔可以幫人補習, 要全職照顧家人, 因為試過補補下突然亞媽唔舒服要入院, 要即刻打電話通知d家長接番d小朋友. 其實佢地家境富裕, 老師唔做野都夠生活開支, 佢成間屋都係擺設, 水晶, 公仔, 書, 精品, 香水. 野食, 全部都係貴野, 幾百幾百一件, 成家駛得相當豪.

 一年保持見2-3次面, 我又開始長大, 大家都變咗朋友會講下家事/近況. 原來老師本身住係澳門, 佢爸爸係黑社會老頭子, 媽媽因為唔鐘意有第三者出現所以帶埋佢黎咗香港, 去人地屋企打工, 之後識咗公公, 公公照顧佢母女再搬埋同佢地一齊住. 所以公公唔係佢爸爸. 人老啦公公開始身體有毛病, 入咗老人院, 老師亦無辦法照顧兩個老人家. 有時會推輪椅帶婆婆去探公公, 每次去都好唔捨得, 因為一齊生活咗咁奈驚老人院照顧得唔好, 跟住公公老人痴呆佢個姪送咗佢番大陸療養院, 無幾奈就過身啦.

之後老師同媽媽就過相依為命生活. 咁樣過咗幾年, 婆婆對眼有白內障, 左邊眼睇唔到野, 右邊眼得一成視力, 每日都係聽電視. 無娛樂可言, 終日都病臥牀. 其實老人家都需要活動, 越唔出街身體就越差. 到到2006年既今日, 婆婆患輕微老人痴呆, 有時連個女個名都記唔到, 失禁失眠一定有, 脊骨已經唔可以再支撐身體, 坐起身都只可以一陣. 所以要長時間訓係牀. 已經係眼科, 聯合,養和醫院常客, 每次覆診都要call 白車. 長時間勞累既老師身體亦都開始出現心臟問題, 因為無收入, 後生時亦太過花費, 生活開支出現問題. 老師同我相量要賣咗屋企d精品, 因為佢儲既野唔係統一歸類, 其實好難賣得出, 每一樣野都買得好貴, 但其實無用. 單單 puzzle 未砌都有十幾盒, 小說有70本以上, 手鈪, 碗碟, 廚房用品, 大量錄影帶無時間睇, 絶版黑膠碟唱片........ 物件有貶值, 捨得賣但價錢都唔會太理想, 起碼得番2-3成. 老師話賣唔出的話最壞打算就要賣樓.

後生既時候, 其實要為將來既問號打算, 你唔會知自已第時係點, 好多野都係控制範圍以外, 老師其實唔老行得走得, 但係為咗媽媽都要長時間困係屋企, 唔可以出去打工. 想請工人, 介紹所都以妳証明有32萬儲蓄. 對於unkown既將來, 奉獻大家儲多d錢妨身啦. 亦祝願呢對母女身體健康.

留言(4) | 引用(0)

好客的奶奶
TAMAMA | 17th Aug 2006 | 一般 | (228 Reads)

我同老公結咗婚一年, 佢係公務員, 但係我地仲未攞到宿舍. 所以我有兩頭住家, 一頭係九龍番媽咪到住, 第二頭係屯門番奶奶到訓, 我奶奶係一個好典型既中國婦女, 佢同老爺好早落咗黎香港, 但係佢地既廣東話仲未好正, 可能係佢地斯文, 唔似得我咁必le爸啦.

我結婚無奈, 就到叔仔結婚, 佢同弟婦已經搬走咗去元朗, $2500 村屋住三樓加天台, 都成千幾呎好夠住, 係交通無咁方便啫. 跟住我奶奶就邀請咗姨婆同表姨兩母女黎住, 我地有三個房比咗一間佢地住. 首先講下姨婆, 佢80歲係隻腳有時痛之外, 都算係一個健康既婆婆, 有日我老公教佢玩數獨之後, 佢就日日都玩數獨, 已經玩哂幾本. 佢又鍾意睇書, 今日佢先問我睇唔睇弗諾e得既心理學書(佢新買架) oh no 我真係嚇親, 因為我見佢成日都睇d好厚既書, 或者小說. 姨婆真係與別不同. 佢本身係香港人跟住去咗菲律賓做生意. 近幾年生意麻麻先番咗香港, 過三日佢就會坐十個鐘頭車番福建住幾個月, 我成日以為人老咗就唔願變, 唔願學, 原來唔係架喎.

跟住講表姨, 佢淨識佢菲律賓話或者英文, 平時我就用好恐佈既英文同佢溝通, 佢30幾歲未結婚, 但其實佢唔錯架, 成5呎89吋, 一頭幼髮到腰, 白白淨. 但我感覺佢好內向, 唔多講野, 佢黎香港住咗7個月, 我諗無出過20次街, 淨係係房上網, 食好少野佢叫我幫佢買本書, 原來佢想學人食肉減肥法, 唉, 邊得呀, 反而我跟聖心醫院個食譜就減到, 不過費事啦, 一陣佢有咩事我擔當唔起, 所以無彈條方比佢.  

留言(2) | 引用(0)

沒有工作的日子
TAMAMA | 17th Aug 2006 | 一般 | (157 Reads)

我終於無做野啦, 今日係第十六日, 心情輕鬆, 因為無壓力所以情緒化既我心情平靜咗, 回顧過去個十年, 第一份工係係美心做秘書一做就係五年, 跟住就入咗間貿易公司一腳踢五年半, 做老閭既貼身妹仔, 但係我學到好多野因為無論大鑊野或雞毛蒜皮我都有機會參與, 係好事 . 好鐘意跟老閭去傾生意, 因為佢會氣定神閒以搞笑手法傾成. 正所謂奸商奸商, 唔奸又點會得到世間財, 奸 - 有分聰明既奸或卑鄙既奸, 我老閭係聰明個隻, 佢轉數好快, 做事大方得睇. 所以被列入朕學習對象之一.

暫時黎講, 我對於前景仲係一個問號, 究竟我應該入邊一行去開始, 人到30希望搵到一份終生職業. 當然錢係好緊要, 起碼要求係足夠生活支出, 有D錢儲下.  夠錢生番個細路仔.

 

留言(0) | 引用(0)