最近收到一個好消息. 從老閭口中得知他的朋友(M先生)生活愉快, 一切安好.

我係上年認識M先生, 亦都親眼見到人生重大挑戰難以形容既感覺.  

11月16日 因為一個同事放飛機, 老閭要我去辦一件事. 當時我地係上海辦展銷會15-17號. 人手吾太充足, 時間好趕.  我去一間好出名既醫院搵M先生, 要將一部手提電話交比佢屋企人用. 好好安排佢地有咩需要. 盡量協助. 司機車我同一個男同事去. 男同事負責帶路因為佢係當地人, 去醫院我地買左札花(同香港一樣咁貴) 去到A座, 原來A座係比軍官或政要入住既, 閒人要住其它座. 認識到M先生太太(50到)及M女 (28歲).  因為醫院block 哂網絡接收, 驚影響儀器. 我就同M小姐去佢住既酒店, 申請開戶(用酒店無線接收, 要每分鐘收錢) 外國人到中國難免有言語上既困難, 除咗去高級餐廳可以用英文, 其它地方都係國語台. 我寫哂中英對照字條, 方便佢搭的士用" 我要去XX 地方" 又去咗超市買日用品之後,  我好趕要番會場啦 (一個鐘車程).

講番點解佢黎醫院, 因為M先生心臟一向有問題, 用緊心臟起伏器. 黎上海係因為有個心臟適合. 但係未知道實際日子換心係邊日, 之前東奔西跑去過好多地方等心臟, 但係都令佢失望, 佢計過係各地醫院連續住咗500日.

18號老閭接到電話, 當時我地番咗廠, 距離上海要3小時車程. M先生第二日一早要做手術. 佢地相識在兒時, 估唔到咁有緣係上海會面(佢地一向有保持聯絡) 要去醫院為佢打打氣, 19號我地零晨5:30要起身6點出門口. 去到醫院大約9點, 點知手術要改12點, 我地就不斷同M一家人傾計,  舒緩緊張氣氛, 聽番老閭同佢細個讀書D往事, 就好似進入咗佢地個世界. 

夠鐘啦, 護士通知可以陪M先生過另一座. 心臟係一個大手術, 要接駁一個新既, 再拆番個心臟起伏器. 中間過程有絲亳問題, 大家都明白個結果. 我地大家都為M先生送上祝福吻. 我見大家都錫咀, 我估係因為最大最勁既祝福, 所以我對呢個新相識既朋友都呈上深深一吻. (All the best, see you later) 簡單既 "一陣間見" 其實呢一句係好有意思.

手術需時4小時, 老閭&老閭娘帶我去上海新天地食飯, M太M小姐跟本無心情食, 留係房等消息. 大約3小時後M小姐來電話醫院通知快D去手術室, 我地係車好驚, 老閭叫司機盡快. 係車一片沈寂氣氛, 大家都好緊要, 老閭叫我問定領事館電話, 因為宗教問題, 有D儀式可能要協助. 我忍唔住, 開始流淚. 估唔到佢過唔到呢關.  去到醫院係手術室門口見到佢d屋企人, 佢地笑住話手術成功, 急叫佢地過係想講呢個好消息. M先生訓起床度推出黎, 我見到佢件衫有血. 麻醉藥未醒. 當時大家都有喊, 係喜悅既喊. 笑住黎喊係仲多眼淚過傷心喊. 個一刻場面好感動. 事後大家講番臨入手術室, "祝福一吻" 原來我企個位角度問題, 以為個個都係錫咀, 原來佢地係錫面, Oh.... 呢個笑話比老閭玩咗我好奈 1) 全靠妳既吻, M先生先醒   2) M先生無錫真妳, 佢好回味  3) 人地個老婆問, "重咩錫我老公呀, 呢個女仔咁架咁開放架(講笑).  Anyway, 呢件事係我人生當中, 絶對值得回味.   

換一個心臟既手術費係約港幣150萬, 真係唔係人人都負擔得起.   

 

枯燥乏味? 即係妳好多姿多采,夜夜笙歌啦? 我問妳一至五 日日番工用9小時. 來回1小時搭車, 早午晚三餐加埋2小時. zzZZZ 9小時. 淨得3小時自由活動 沖涼呢? 睇TV 無乜得淨, 係咁上下啦. 我地暫時無宿舍, 為左見面大家辛苦D, 係搭車奈囉. 屯門 - 尖沙咀 - 德福 - 屯門  或 德福 - 尖沙咀 - 屯門. (自由組合). 我地唔鐘意行街架, 最開心就係去食飯囉, 家陣未有宿舍, 無乜大開支, 可以去食好D. 兩口子週圍去.

妳要聽勁野, 咁我講婚後性生活啦, 我用緊避孕貼EVRA . 上年7月前開始用. 一包有三張貼紙. 每個禮拜一張, 通常我貼蘿柚. 第四個禮拜就會黎M. 咁下一個禮拜再用新一包囉. 唔... $120-140 係藥房買海鮮價. 有D死佬好衰架. 問佢: 唔該比盒 EVRA 避孕貼呀. 佬: 咩話,  我: 有無避孕貼  佬: 我地無呢D野(笑)  挑拿加陣我買避孕套咩, 好出奇呀.  我駛唔駛笠個紙袋買或者上網bid呀.  0車, 我老公先唔介意, 屯門買貼貼平, 佢有時幫我買定添. 講真呢個年代, 未結婚都可以買啫. 係保護自已. 我有個女仔fd 奶咗野啦, 有咗啦. 呢呢拿拿註冊囉. 幾趕.  

我如果要BB, 就起碼要停用半年EVRA. 係個說明書寫明架. 我覺得好方便, 唔鐿意打針囉.

我老公又名"火爐人" 佢好熱架, 佢冬天唔駛用羽絨被, 用個被袋夠暖. 佢好好架臨訓會幫我蓋羽絨被, 自己用被袋. 好偉大呢.  但係每晚半夜我都凍醒, 發現佢搶咗張被, , 同佢搶, 跟本無用, 佢用個身捲住張被, 點搶? 我惟有起身著風褸訓囉.

有晚天文台話得番10度, 新界低2度, 我驚死, 同佢一齊去吉之島買被囉, 不過都開心架, 一齊去格價, 我地鐘意好厚好似酒店用個d, 簡下顏色. 買咗張king size 唔駛爭, 番到屋企有新被用lu. 仲特登早訓添.  不過人係好抵死架, 個晚訓到半夜好熱, 我地推開咗張新被. 又用番個張無哂羽絨甩皮甩骨既被, 再爭過.... 

 

 

 

我呢幾日心情麻麻, 問清楚自已做乜野, 1) 倦 2) 工作壓力啦 不過我同自已講, 平時開開心心, 工作順利心情好, 間唔中一定會有D不如意 (係咪好亞Q精神呢) 唔會一世人都無風無浪. 其實係星期五放工前比船公司d人無啦啦鬧左一餐. 全件事其實我可以不理, 關我屁事, 但係我既性格真係好想 "門小" 佢, 但又要顧住自已代表公司, 顧住份工. 無計, 惟有死忍. 我未試過比人激到塊面谷到紅哂, 再加上 "震" 如果我有心臟病, 應該就係個段時間死左. 但係我今次又學會一件事, 將來如果角色對換, 我唔好好似個死粉腸咁, 應盡量解決問題, 唔好再火上加油. 因為太令人難受, 我都要改進下我反應太大, 應該尤得佢, 佢要嘈味嘈囉, 我最好既反應就係無反應. 但願我做到. 我老公對我好好, 但因為我心情太複雜, 自已難控制, 我又唔會發佢脾氣, 只係會小左講野, 食唔落野, (我打緊呢篇野, 佢又望住我啦!!) 依家打左出黎, 就好以去完大便一樣, 舒服哂.

因為前兩日都無食午餐. 今日唔肚餓, 我兩點鐘落去麥記買朱古力新地食. 個度D姐姐邀請我做問卷, 是蛋啦我咁得閒, 點知佢話試雪糕, 我話下? 又食? 佢話有三款, 每款試幾啖啦, 我話妳整每款一啖好啦. 好肥架

點知佢整咗三大杯出黎(其實係普通蛋糕淋唔同味既醬, 硬咗變脆筒)

香芋 - OK啦. 不過隻色灰灰地, 唔靚囉

橙 - 0華好甜呀

綠茶 - 點解可以咁難食 勁甜又苦.

我每杯食咗一啖, 好浪費. 不過無辦法啦. 佢話第時賣3.5喎

過咗2個鐘後, 我疴咗3次, 就死.

3月9日既行程, 先番公司做野, 11點搭巴士去機場接老閭, 預計12:15落機. 我12點到咗. 點知.... delay 等到1:40 又呢呢拉拉搭大巴上深圳2個鐘, 再轉租車20分鐘去見客. 約人4點, 遲到10分鐘, 因為過落馬洲就好順利, 過皇崗就好奈. 開會到5:30, 搭租車20分鐘番羅湖口岸. 搭KCR 去沙田BOOK 咗8折的士送老閭番機場. 佢要番法國. 我地都無時間食過野. 我既午餐+晚餐係7:30. 我老公飛出黎同我食 Pizza HUT 我個胃好痛. 呢D就係我既生活.  

呢兩日好倦, 3.8婦女節個日上咗順德見客即日來回 (我老公好好陪我去) 其實真係好辛苦既旅程. 個朝9點前我到咗粉嶺接我老公放工, 佢著住制服個look 好得意. 跟住就搭9.:45大巴去順德碧桂園 要3個鐘, 坐到pet pet 都硬, 到達之後, 我個客楂車黎接我地 又要45分鐘番廠. 無時間食午飯, 係廠逗留2個鐘, 呢呢拉拉又要楂車番碧桂園趕搭3:55 大巴番香港. 我番到屋企已經8點. 我同老公超級肚餓因為隨咗朝早買MC DONALD係大巴食, . 午+晩飯係牛頭角打冷, 可憐既波波又要搭45分鐘番屯門.

大家知麻, 大陸既空氣污染己經好嚴重, 跟本見唔到天空, 灰灰黑黑, 係由於間間廠都釋放有毒廢氣. 眼見周圍都堆滿垃圾.個地下乜都有. 真係好污糟. 長期係呢d地方生活, 好影響健康. 我個客近期去咗加拿大, (因為佢要個仔去讀書. 要比約60萬港幣投資移民, 再係個邊供緊層樓). 佢同我講好奈都無見過天空係藍色.

老閭係上海遠d位置投資一個食品廠, 我係上年11月去咗2個禮拜非人生活, 本來話去一個星期, 後咩被扣留加多一個星期既我, 天氣凍唔夠衫, 鞋得一對. 衫無洗過. 點解唔洗? 因為每朝5-6點起身番工, 夜晚同客人食飯, 晚晚9-10 番到酒店(一個星期) 老閭屋企(一個星期), 沖涼洗頭11點訓, 日日倦到死. 平時住好, 食好既我當然覺得辛苦. 但係個度d人日日生活都係咁.

 方圓百里外無超級市場, 無食肆, 士多淨係賣生果. 司機車我去超市個日, 對我黎講係一個大節目, 我好開心. 飲汽水無可能, 日日都係飲水, 食刀叉早餐? 有塊餅都已經好好

最想同大家分享係, 我地廠有150員工, 普遍月薪人民幣 800 -3000 $800 搬貨個個男仔, 電腦識寫程式, 大學程度  $2800 老閭助理, 主修英文, 副修法文, 大學程度. 可以係30分鐘翻譯一篇我連中文同睇唔明既文件 " 中國市委會發展.... 投資??  "   $2000-$2500  識法文. 個個都咁勁, 相反我... 我係香港人工算唔錯, 老閭對我好, 但係我中五畢業, 英文 / 普通話半桶水. 無學歷, 會話唔得. 我深信好快有一日大陸人會超越香港好多好多.

透過同其它人傾計, 可以知道自已係香港長大係幾咁幸福, 我係大陸要跟一個師傅學焗麵包, 佢話我知家住湖南, 由廠番上海要1.5小時, 再加搭火車30小時. 好奈無見過屋企人, 年年都希望新年有假番去, 不過因為工作忙都無時間, 惟有寄錢比父母, 佢父母係農村耕田, 有個妹係上海做鞋工廠, 我有一日同師傅去咗上海做野, 我問" 可以約妹妹見面麻? 師傅話好多年無見過個妹, 就算大家都係上海, 妹妹係上海郊區要搭1小時巴士去上海市, 來回幾個鐘約唔到. 一家人東一個西一個, 為既係賺錢養家, 我覺得好無奈.

大陸同香港對於家庭觀念有好大分別, 我地香港人二十八歲前結婚比人話早婚. 大陸個個二十二度就要生仔. 二十六仲未結就開始好緊張. 要搵人相睇. 我d同事好多個都細過我. 平均個仔都有7-8歲. 但係佢地只可以生一個. 國家規定就連簽工作合約都要寫明, 遵守國家法例只可以生一個. 我地香港任你生, 大家就偏偏話生活指數高, 唔生.  我認為養小朋友無錯要留意開支, 但無人話一定讀名校, 著名牌. 視乎父母啫.

 

 

 

留言(1) | 引用(0)